Mơguah lơ 20/8, Khua dêh čar ơi Phạm Minh Chính hơmâo ngă bruă hăng Khul khua apăn bruă Ping gah tơring čar Kon Tum kơ pơđĭ kyar bơwih ƀong huă - mơnuih mơnam hăng pơsir hĭ hơdôm tơlơi rơkâo đĭ kiăng Kon Tum pơđĭ kyar tañ, hơđong kơjăp. Tơdơi kơ hmư̆ tơlơi pơgôp hiăp mơ̆ng ƀing khua mua, Khua dêh čar ơi Phạm Minh Chính bơni kơ tơlơi gum pơgôp hăng lăng yôm hơdôm boh than hơmâo ngă mơ̆ng Ping gah, gong gai, tơhan hăng mơnuih ƀôn sang tơring čar Kon Tum, djru pơđĭ kyar bơwih ƀong hrŏm mơ̆ng dêh čar. Khua dêh čar črâo rơđah hơdôm boh than hơmâo ngă mơ̆ng tơring čar wơ̆t hăng tơlơi aka ƀu dưi ngă, tơlơi aka ƀu djơ̆ kiăng pơsir. Amăng hrơi blan pơ anăp, tơring čar kiăng pơphun ngă tŭ yua Tơlơi pơsit jơnum ping gah dêh čar tal 13, Tơlơi pơsit mrô 23 mơ̆ng Ding jum kơđi čar hăng Tơlơi pơsit Jơnum ping gah tơring čar; amăng anun khŏm ngă klă tui 5 tơlơi pơkă pơphun ngă bruă mơ̆ng Ping gah. Lăng yôm bruă gum pơgôp, hrưn đĭ, ngă mă pô; ƀu tơguan arăng pơđar, pơčeh phrâo na nao, mă yua hơdôm tơlơi gêh gal, tơlơi hơmâo, pơhưč hăng mă yua klă djŏp tơlơi gêh gal či đĭ kyar. Hrŏm hăng anun, Khua dêh čar kiăng tơring čar pơƀut pơđĭ kyar bơwih ƀong mơtah, bơwih ƀong mrô, bơwih ƀong lok nao rai. Pơtrut pơtruh nao rai kual bơwih ƀong kiăng hơmâo anih pơđĭ kyar djơ̆ hrŏm. Pơlir anih pơđĭ kyar bơwih ƀong mơ̆ng tơring čar hăng hơdôm boh tơring čar ter hang ia rơsĭ Tong krah tui jơlan 14, 24 hăng guai dêh čar Việt Nam - Lao - Kur.

Hlâo kơ anun, amăng hơdră hyu mă bruă ƀơi tơring čar Kon Tum, Khua dêh čar ơi Phạm Minh Chính hrŏm hăng grup khua mua hyu mă bruă nao ĕp lăng lu anih hlăk dŏ pok pơhai mă bruă, ngă tui kơčăo bruă bơwih ƀong huă pơđĭ kyar mơnuih mơnam tơring čar Kon Tum. Khua dêh čar ơi Phạm Minh Chính hrŏm hăng grup nao ĕp lăng anih pơkă hnong man pơdong gong dar pơkĕ apui lơtrik hăng jua angin ƀơi Kon Tum, pơdong ƀơi să Tân Lập, tơring glông Kon Braih. Khua dêh čar pơtrun hiăp djop ding jum, anom bruă gơnong dlông hăng tơring čar Kon Tum ăt khom jŭ yap glăi, pơtong lăng kơsem min tong ten, hơdră tuh pơ alin pơkra apui lơtrik pơkĕ hăng ačăng dar jua angin tŭ yua, gêh găl djơ̆ hnong pơkă abih bang amăng kual laih anun amăng dêh čar; pơhlôm bruă mă pơhaih rơđah, tong ten, tơpă, djơ̆ tơlơi phiăn kiăng ba glăi boh tŭ yua kơ tơring čar Kon Tum.

Khua dêh čar nao ĕp lăng bruă pơkă lăng man pơkra tơdron rơdêh por ƀơi Măng Đen; anih him lăng čuk pơkra jơlan rơdêh đuăi hmar mơ̆ng Kon Tum nao pơ  Quảng Ngãi; jơlan dêh čar mrô 24 pơtruh nao rai Kon Tum hăng Quảng Ngãi; anih pơhưč tuh pơ alin man pơdong plơi prong phrâo, anih akŏ pơjing bruă bơwih bơwăng sĭ mơdrô, čơkă tuai čuă ngui kual Ngŏ Dơnung tơring glông Kon Plong, tơring čar Kon Tum. Tơdơi kơ nao ĕp lăng hmư̆ lăi pơthâo hlâo anih čơkă tuai gưl dêh čar Măng Đen hăng jơlan glông nao rai, Khua dêh čar ơi Phạm Minh Chính lăi, bruă pơđĭ kyar anih tuai hyu ngui gưl dêh čar ƀơi Măng Đen khom djơ̆ găl hăng bruă pơhlôm pơgang ayuh hyiăng kyâo glai mơtah mơda na nao amăng tơring čar Kon Tum; yua anun tơring čar Kon Tum, djop ding jum djơ̆ hrŏm khom hneč mă anŏ gêh găl hăng pơsir hĭ anŏ dŏ kơƀah gun ƀơi Măng Đen, biă mă ñu ƀu ngă rơngiă hĭ hnong hnăi lŏn mơnai glai klô hiam ƀơi Măng Đen.

Tlam mơmot lơ 19/8 mơn, nao čuă Plơi gru grua tuai hyu ngui Kon Pring ƀơi tơring kual Măng Đen, Khua dêh čar ơi Phạm Minh Chính pơsit, gum pơgôp jing bruă yôm phun, pơsit dưi hă ƀŭ mơ̆ng bruă hơkrŭ Việt Nam; laih dong jing gru grua yôm biă mơ̆ng djuai ania ta, yua hnun, neh met wa khŏm pơgang, djă pioh hăng pơtrut tui. Khua dêh čar kiăng neh met wa thâo lăng nao rai, gum djru tơdruă pơđĭ kyar bơwih ƀong huă - mơnuih mơnam; ngă tui jơlan jơlan hơdră mơ̆ng Ping gah, tơlơi phiăn mơ̆ng kơnuk kơna; ngă hơđong rơnuk rơnua plơi pla, ƀu hmư̆ arăng plư pleč pơčut pơčao ôh, djă pioh gru grua hiam mơ̆ng djuai ania...Ƀrô hrơi prăp mut thun hrăm phâo 2023-2024, nao čuă Sang hră muai Măng Đen ƀơi tơring kual Măng Đen, tơring glông Kon Plong, Khua dêh čar ơi Phạm Minh Chính kiăng ƀing nai pơtô pơplih hơdră pơtô, kiăng sang hră prăp lui klă hiam anih pơtô. Ƀrô tal anai, Khua dêh čar brơi gơnam hơmâo nua 1 klai prăk djru tuh pơ alin pơkra anih hrăm, blơi gơnam yua hrăm hră, gơnam ngui kơ ƀing čơđai.