Khua dêh čar hơmâo nao čuă sa, dua anom bơwih ƀong sĭ mơdrô ƀơi kual bơwih ƀong huă Nhơn Hội hăng juh alum neh met wa ƀơi să Đề Gi, tơdrun mă akan hơdang Đề Gi, kual man pơdong plơi pla phrâo An Quan bơdjơ̆ nao mơng kơthel mrô 13. Nao čuă kual bơwih ƀong Nhơn Hội, Khua dêh čar rơkâo tơring čar pơkiăo nao mơnuih mă bruă, gơnam măi mok tañ nao rơmet pơagaih anih răm rai yua kơthel ngă, hơkrŭ glăi bruă bơwih ƀong huă, sĭ mơdrô, hơđong bruă mă brơi mơnuih ƀôn sang. Khua dêh čar brơi thâo, hơmâo git gai hơdôm sang bruă prăk hơmâo rơnoh prăk brơi čan, hrŏ trun plai djru brơi anom bơwih ƀong sĭ mơdrô hrŏ ƀiă anŏ răm rai; gơnong bruă prăk kak kơsem min hơdôm hơdră pơhrŏ trun jia, prăk duh; gir run tŏ tui hơđong tơlơi hơdip mơda kơ mơnuih mă bruă. Nao tơña bla hơdôm boh sang anŏ bơdjơ̆ nao kơtang yua ia glăk, ia blai, ngă rai răm ƀơi să Đề Gi, Khua dêh čar rơkâo djop gưl, gong gai, ling tơhan, kông ang amăng ƀon lan djru brơi neh met wa rơmet pơagaih, pơkra ming sang dŏ, sit biă ñu hơđong tơlơi bơwih ƀong huă brơi mơnuih ƀon sang, hơkrŭ glăi bơwih ƀong sĭ mơdrô; djru brơi neh met wa kơ prăk čan, kmlai, mă yua hơdôm pơjeh phun pla, hlô rông, sit biă ñu lĕ rông hơdang.

Khua dêh čar čang rơmang neh met wa ngă tui pran gơgrong mă pô, găn rơgao tơnap tap, hrưn đĭ amăng tơlơi hơdip mơda. Ƀrô tal hơdor glăi 95 thun hrơi gru grua Jơnum min djop djuai ania pơlir hơbit Việt Nam, ră anai lĕ Jơnum min djop djuai ania mơnuih mơnam Việt Nam, Khua dêh čar ơi Phạm Minh Chính nao jơnum hrŏm hrơi ngui gum pơgôp djop djuai ania hăng mơnuih ƀôn sang ƀơi plơi Thắng Kiên, să Đề Gi, tơring čar Gia Lai. Lăi pơtong kơ pơjing, hơkrŭ pran gum pơgôp, juh alum pran jua mơnuih ƀôn sang, djru tơdruă găn rơgao tơnap tap, Khua dêh čar brơi thâo “Kơnuk kơna djru hrŏm, ƀon lan gum hrŏm, mơnuih ƀôn sang lăng nao rai”; gum tơngan hrŏm ngă bruă, pơsir hĭ hơdôm tơlơi tơnap tap, tơlơi lông, ngă tui hơdôm tơlơi gal, tŭ mă hrŏm hơdôm tơlơi yâo mơ-ak. Yang hrơi dong anun mơn, Khua dêh čar ơi Phạm Minh Chính hơmâo nao čuă, mă bruă hăng anom bruă git gai tơhan wai pơgang guai tơring čar Gia Lai.