Lơ 12/9 tom brơi, ăt amăng tal nao mă bruă hyu ĕp lăng tơlơi pơhing ia ling dăo ngă, Khua dêh čar ơi Phạm Minh Chính ƀu anăm añ tah, ol kơdol pran jua lơ̆m nao pơ plơi Nủ, să Phúc Khánh, tơring glông Bảo Yên, Lao Cai.Tui hăng tơlơi lăi pơthâo, tơring čar Lao Cai hơmâo 6/9 boh tơring glông, plơi prong, plơi prong phun hơmâo mơnuih djai soh. Mrô mơnuih djai hăng rơka truh 255 čô, amăng anun mơnuih djai 98 čô, mơnuih rơngiă 81 čô, mơnuih rơka rơkač 76 čô.

Kơnong ƀơi plơi Nủ, să Phúc Khánh, tơring glông Bảo yên hơmâo ĕp 44 čô drơi jăn atâo mơnuih djai. Khua dêh čar ol kơdol pran jua, nao tơl anih lŏn dor, lŏm tơhlom abih plơi, dor mơnuih ƀôn sang, nao hrŏm ƀing ling tơhan, kông an hyu ĕp drơi jăn atâo ƀing djai amăng hlŭ dơlut laih anun kah pơpha tơlơi thâo thăi bruă tom ngă ĕp mơnuih hơmâo tơlơi truh hăng ƀing tơhan pơklaih mơnuih mông ječ ameč. Mă bruă hăng khua mua gong gai kơnuk kơna, Khua dêh čar dlưh pran jua mơ-it hiăp juh alum sang anŏ hơmâo mơnuih djai. Khua dêh čar pơtrun hiăp brơi hyu ĕp dơ̆ng 51 čô mơnuih dŏ rơngiă, hăng mơnuih rơka rơkač lĕ khom pơjrao tong ten, djop djel. Khom rơmet rơgoh anih dŏ, pơhlôm klin kheng, rŭ pơkra glăi jơlan nao rai. Khua dêh čar rơkâo anom bruă jơnum min djop djuai ania mơnuih mơnam dêh čar, djop khul grup mơnuih tơpuôl djru ba kơ mơnuih ƀôn sang pơ anai hlăk bưp tơlơi tơnap tap.