Ƀơi mông jôk anun, Khua dêh čar ơi Phạm Minh Chính mơ-it hiăp juh alum hrŏm mơ̆ng Khua git gai ping gah ơi Nguyễn Phú Trọng, Khua mir sir ơi Võ Văn Thưởng, Khua git gai pơ ala mơnuih ƀôn sang dêh čar ơi Vương Đình Huệ hăng khua mua pơprong mơ̆ng dêh čar Việt Nam, pơtruh brơi Khua git gai ping gah, Khua mir sir dêh čar Khač ơi Tập Cận Bình, Khua dêh čar ơi Lý Cường, Khua git gai pơ ala mơnuih ƀôn sang dêh čar Khač ơi Lạc Tế, hăng ƀing khua mua amăng kơnuk kơna dêh čar Khač laih anun sang anŏ khua hơđăp dêh čar Khač, rơgŏm ơi Lý Khắc Cường. Khua dêh čar ơi Phạm Minh Chính lăi, Ping gah, Kơnuk kơna hăng mơnuih ƀôn sang Việt Nam pơpŭ bơni hơdor mơ̆n kơ pran jua, bruă mă, tơlơi djru hrŏm prong prin mơ̆ng rơgŏm ơi Lý Khắc Cường amăng bruă mă dua ping gah, dua kơnuk kơna hăng mơnuih ƀôn sang Khač-Việt Nam.

Khua anih jưh pơ ala dêh čar Khač ƀơi Việt Nam, ơi Hùng Ba bơni kơ Khua git gai ping gah ơi Nguyễn Phú Trọng, Khua mir sir ơi Võ Văn Thưởng, Khua dêh čar ơi Phạm Minh Chính laih anun Khua git gai pơ ala mơnuih ƀôn sang dêh čar ơi Vương Đình Huệ hơmâo mơ-it tơlơi pơhiăp rơngôt hning hrŏm, tơki kơ ơi Phạm Minh Chính khua dêh čar ba jơlan hlâo grup khua mua djop anom bruă Ping gah, kơnuk kơna, lŏn ia, anom bruă pơ ala mơnuih ƀôn sang, sang bruă djop djuai ania mơnuih mơnam Việt Nam nao jôk hăng čih pioh amăng hơdrôm hră pơyua atâo; laih dơ̆ng lăi pơtong, ping gah, kơnuk kơna hăng mơnuih ƀôn sang dêh čar Khač ăt gir run pơtrut tui bruă ngă giăng mah hiam mơak, jing bơnah ngă hrŏm yôm pơphăn Việt Nam hăng Khač.