Amăng mông jơnum, ƀing bơwih ƀong sĭ mơdrô hmư̆ khua mua djop ding jum, gơnong bruă lăi pơthâo tơlơi dưi ngă hrŏm kơplah wah dua boh dêh čar, hơdră pơhưč tuh pơ alin mơng rĭm bơnah. Hơdôm anom bơwih ƀong sĭ mơdrô Saudi Arabia lăng yôm tơlơi gal tuh pơ alin, bơwih ƀong jai hrơi pơplih ƀơi Việt Nam; laih dong ĕp tơlơi dưi ngă hrŏm tuh pơ alin, pơlir hơbit bơwih ƀong, hơmâo tơlơi rơkâo đĭ kơnuk kơna, djop ding jum, gơnong bruă dua boh dêh čar hăng ba tơbiă hơdôm akŏ bruă ngă hrŏm tong ten hăng čang rơmang ba glăi hơdôm rơnoh yôm phrâo hăng pơtrut pơđĭ kyar phrâo kiăng pơtrut, hrưn đĭ tơlơi rô nao rai ngă hrŏm bơwih ƀong huă mơng dua bơnah jai klă tui hăng dơlăm ƀiă dong pơ anăp anai.

Khua khul pơlir hơbit hơdôm anom bruă sĭ mơdrô Saudi Arabia čơkă Khua dêh čar ơi Phạm Minh Chính nao JơnumĐĭ pơhiăp amăng mông jơnum, Khua dêh čar ơi Phạm Minh Chính lăi rơđah, Việt Nam amra ngă gêh gal brơi hơdôm anom bruă tuh pơ alin mă bruă gêh gal, hơđong kjăp, sui thun ƀơi Việt Nam. Khua dêh čar čang rơmang Việt Nam hăng Saudi Arabia amra gum hrŏm kjăp, jing anih pơtruh nao rai kiăng anom bơwih ƀong sĭ mơdrô dua bơnah ƀu djơ̆ kơnong dưi mut hrŏm bơwih ƀong đôč ôh ăt dưi pok prong nao hơdôm kual hơmâo tơlơi dưi, pok prong amăng kual ASEAN hăng GCC.

Ăt amăng lơ 19/10 mơn, Khua dêh čar ơi Phạm Minh Chính hơmâo tŭ jum Khua ding jum Bơwih ƀong hăng Man pơphô bruă Saudi Arabia hăng Khua ding jum Mơnuih mă bruă hăng pơđĭ kyar mơnuih mơnam Saudi Arabia. Ƀơi mông tŭ jum, Khua dêh čar ơi Phạm Minh Chính bơni hơ-ơč kơ hơdôm tơlơi dưi ngă prong mơ̆ng dêh čar Saudi Arabia  amăng bruă pơđĭ tui lu bruă bơwih ƀong gah rơngiao kơ ia jâo, pơtrut mă yua boh thâo măi mok phrâo, pơčeh phrâo, djru bruă đĭ kyar mơtah, hơđong, anăp nao dưi ngă djŏp bruă kiăng ngă amăng jơlan hơdră “Anăp nao thun 2030”.

Pơsit tơlơi rô nao rai ngă hrŏm kơplah wah Việt Nam - Saudi Arabia glăk đĭ kyar klă hiam, ăt dŏ hơmâo lu tơlơi gêh gal či ngă hrŏm, Khua dêh čar kiăng dua bơnah pơtruh nao rai hloh, ngă hrŏm sĭ mơdrô, tuh pơ alin, amăng anun ngă hrŏm hlâo amăng bruă apui lơtrik, prăk kăk, amăng bruă phrâo kah hăng pơkra gơnam Halal, pơplih mrô...