Jơnum khua mua BRICS thun 2025 pơphun amăng mơguah lơ 6/7, ƀơi Rio De Janeiro, dêh čar Brazil. Anai lĕ tal blung a Việt Nam nao jơnum hrŏm lăng kar hăng dêh čar ngă gŏp amăng Jơnum khua mua BRICS, sa khul ngă hrŏm djop bơnah kơplah wah hơdôm boh dêh čar phrâo pơđĭ kyar hăng jai hrơi hơmâo tơlơi pơtrut kơtang amăng bơwih ƀong huă hăng kơđi čar. Jơnum khua mua BRICS thun 2025 hăng anăn “Kơtưn ngă hrŏm kual Dơnung kiăng pơtrut wai lăng abih bang hăng hơđong kjăp ƀiă dong”, anai lĕ sa amăng hơdôm jơnum lu bơnah yôm phăn, hơmâo tơlơi mut hrŏm mơng giăm 20 čô khua mua pơprong hơdôm boh dêh čar, Khua čih pioh Sang gum hơbit djop dêh čar hăng khua mua khul grup jar kmar.

Khua dêh čar ơi Phạm Minh Chính nao jơnum hăng đĭ pơhiăp amăng mông jơnum pơčrông sai khua mua pơprong hăng anăn: Kơtưn ngă hrŏm djop bơnah, hơdôm bruă bơwih ƀong, prăk kak hăng boh thâo ia rơgơi; ayuh hyiăng, COP 30 hăng ia jrao rŏng lŏn tơnah; hăng nao lăng mông lăi pơthâo tơlơi pơsit hrŏm mơng ƀing khua mua kơ bruă prăk yua pơgang ayuh hyiăng hăng pok pơhai ngă hrŏm BRICS kơ pơgang hĭ kman ƀă amăng mơnuih mơnam. Amăng dua hrơi pơphun jơnum, hơdôm boh dêh čar ding kơna BRICS đing nao hơdôm bruă kơtưn ngă hrŏm amăng bruă ia jrao, boh thâo ia rơgơi hăng ayuh hyiăng pơplih sat.