VOV4.Jarai-Tlam lơ 13/10, Khua dêh čar ơi Phạm Minh Chính nao jơnum hrom pơthâo Plang pơdah rup tivi dêh čar amăng kual Yŭ dơnung dêh čar-VTV Cần Thơ. Bruă man pơdong sang bruă pơdah rup dêh čar VTV Cần Thơ anăp nao amăng kual Yŭ Dơnung dêh čar kiăng kơtưn pôr tơlơi pơhing, pơtô pơblang, ngă tui bruă kơđi čar mơ̆ng Gong phun pơdah rup Việt Nam ƀơi kual anai; pơjing bruă mă pơtruh nao rai tơlơi pơhing plah wah Kơnuk kơna hăng djop sang bruă gong gai kơnuk kơna amăng kual laih anun mơnuih ƀôn sang kiăng bang hyu tơlơi bơngač, pơtrut pran jua, djru hrom man pơdong plơi pla tơlơi hơdip mơda mơnuih mơnam hiam klă hloh.

Khua dêh čar ơi Phạm Minh Chính nao jơnum lăi pơthâo Plang pơdah rup dêh čar VTV Cần Thơ

Pơhiăp ƀơi mông jơnum, Khua dêh čar ơi Phạm Minh Chính đăo kơnang, hăng tơlơi thâo, tañ ƀuh, hmar, rơgơi mơbruă laih anun ngă hrom khut khăt mơ̆ng abih bang khua mua, mơnuih mă bruă amăng Gong phun pơdah rup Việt Nam, tơlơi djru hrom mơ̆ng djop sang bruă kơnuk kơna amăng kual, djop tơring čar laih anun mơnuih ƀôn sang, sang bruă pơdah rup dêh čar VTV Cần Thơ amra pơđĭ kyar hmar hloh hăng hơđong kjăp; dưi pơdah rup pôr tơlơi pơhing hlom bom amăng kual ia krông Cửu Long laih anun amăng dêh čar, kiăng ngă giong bruă kơđi čar mơ̆ng Ping gah, Kơnuk kơna, mơnuih ƀôn sang jao brơi laih.

Nay Jek: Pơblang