Đĭ pơhiăp amăng mông jơnum, Khua ding jum sĭ mơdrô Nguyễn Hồng Diên lăi pơtong, logistics lĕ gơnong bruă bơwih bơwang arăng lăng kar hăng “ară drah” rô nao rai amăng bơwih ƀong huă, yôm phăn biă mă amăng bruă pơlir hơbit, djru brơi anom bơwih ƀong sĭ mơdrô, anih anom pơkra pơjing plai ƀiă prăk tuh pơ alin, pơhrŏ ƀiă nua gơnam, đĭ tui bruă bơkơtưn, pơtrut pơđĭ kyar bơwih ƀong huă-mơnuih mơnam.

Amăng mông jơnum, ƀing pơgôp hiăp hơmâo lăi pơthâo hơdôm tơlơi čih bơdjơ̆ nao bruă logistics anun lĕ: tơlơi dưi, tơlơi gal amăng pơjing hăng pơđĭ kyar kual sĭ mơdrô rơngai pơlir hăng hơdôm tơdrun kŏmpăn ƀơi Bà Rịa-Vũng Tàu; thun blan hrưn hyu djop anih: Anih anom pơdŭ pơgiăng gơnam amăng ia rơsĭ Việt Nam pơlir hăng hơdôm kual sĭ mơdrô rơngai; mă yua boh thâo phrâo hăng hơdră bruă prăk kak amăng git gai kual sĭ mơdrô rơngai hăng pơtrut pơđĭ kyar logistics; jơlan gah mơng logistics sĭ mơdrô điện tử tơbiă hyu gah rơngiao hăng hơdôm jơlan yak nao brơi kơ Việt Nam.