Ring bruă anai dưi man pơkra rơnč thun 2024, tui hăng tơlơi pơtrun hiăp ječ ameč, pơhrua hĭ tơdrông tua hơđăp dlưh trun yua kơthel Yagi blan 9/2024 ngă rai ia ling dăo kor đuăi. Tơdrông tua anai, rơnoh prăk man pơkra abih tih 635 klai samơ̆, laih ngă giong rơnoh prăk tuh pơ alin abih kơnong 438 klai prăk, dưi pơkrem kơ kơnuk kơna truh 196 klai laih anun tañ hloh 3 blan pơkă hăng hrơi blan him lăng hlâo.

Binh đoàn 12-Phun kông ty Man pơdong Trường Sơn pô gơgrong ba mă bruă man pơdong. Pơhiăp mông jơnum mă yua tơdrông tua, Khua dêh čar ơi Phạm Minh Chính lăng yom Tơdrông tua Phong Châu anai, yua ƀuh rơđah tơlơi gir run khut khăt mơ̆ng djop ding jum, anom bruă hăng tơring čar ngă hrŏm man pơkra, tañ giong pơkă hăng hrơi blan juăt man pơkra tơdrông tua prong dlông kah hăng anun lĕ truh 10 thun kah giong, laih anun dưi pơhlôm klă hăng rơnuk rơnua kơ tơdrông tua anai. Rơnoh prăk dưi pơkrem amra tuh pơ alin kơ bruă čuk pơkra, man kơjăp dua bơnah akŏ tơdrông tua, djru pơsir anŏ răm ƀăm yua kơthel ngă, djru pơ hơđong tơlơi hơdip mơnuih ƀôn sang dŏ jĕ giăm tơdrông tua anun.