Amăng mông jơnum, khua dêh čar rơkâo gơnong bruă pơtom hiăp tŏ ngă tui tơlơi gơgrong ba jơlan hlâo, pơplih kơtang amăng tơlơi pơmĭn hăng jơlan gah pok pơhai bruă pơtom hiăp amăng djop mơta bruă; pơjing bruă pơtom hiăp djop mơta, pơplih phrâo, yôm phara amăng pơtom hiăp mơng Việt Nam-kjăp khăng khŏp amăng tơhnal pơkă, tơdŭ rơmuăn amăng hơdră bruă, hiam klă amăng gum djru nao rai, tơpă tui tơlơi dưi lŏn ia-djuai ania, lăp djơ̆ hăng Tơlơi pơkôl mơng sang gum hơbit djop dêh čar hăng tơlơi phiăn jar kmar.

Khua dêh čar đăo gơnang hăng čang rơmang hăng gru grua hing ang 80 thun rơgao, gơnong bruă pơtom hiăp amra tŏ tui pran gơgrong ba jơlan hlâo, gum pơgôp, pơčeh phrâo, ba glăi lu tơlơi dưi pơprong ƀiă dong, pơgôp hrŏm hăng đơ đam dêh čar kjăp yak nao rơnuk pơplih phrâo-rơnuk pơđĭ kyar prong kơtang, pơdrong sah, hiam klă, yâo mơ-ak, kjăp pran yak đĭ chủ nghĩa xã hội.