Ƀơi anăp bruă hơmâo tơlơi truh lŏn tơhlŏm kơtang ƀơi lu boh tơring čar, amăng jơlan hơdră bruă mă ƀơi Kual lŏn dăo ia krông Cửu Long, tlam lơ 11/8 Khua dêh čar ơi Phạm Minh Chính hrŏm hăng grup khua mơ̆ng Kơnuk kơna hăng Khua mua Ping gah 3 boh tơring čar Cà Mau, Sóc Trăng, Bạc Liêu nao pel ĕp, sem lăng, pơtŏng glăi bruă lŏn tơhroh, tơhlŏm ƀơi hang ia krông, ia rơsĭ glăk kơtang biă mă ƀơi hơdôm boh tơring čar. Tơdơi kơ nao sem lăng, Khua dêh čar ơi Phạm Minh Chính hăng khua mua mơ̆ng Kơnuk kơna hơmâo mông jơnum hăng 3 čô khua tơring čar Cà Mau, Sóc Trăng hăng Bạc Liêu, či pơtŏng glăi tơlơi truh hăng pơsir hĭ tơlơi tơlơi truh lŏn tơhroh ƀơi ia krông, ia rơsĭ ƀơi hơdôm boh tơring čar.

Pơhiăp ƀơi mông ngă bruă hăng 3 boh tơring čar, Khua dêh čar ơi Phạm Minh Chính lăi, ƀơi anăp, hơdôm boh tơring djru ngă hơđong tơlơi hơdip mơda kơ mơnuih ƀôn sang ƀơi anih amuñ hơmâo tơlơi truh lŏn tơhlŏm, hơmâo anih dŏ hơđong. Ba pơđuăi hơdôm boh sang dong amăng anih amuñ hơmâo tơlơi truh lŏn tơhlŏm, hŭi kơ ƀu hơmâo pơgang, hŭi hơmâo tơlơi djai brŭ. Khua dêh čar kiăng hơdôm ding jum, anom bruă thâo kơjăp tơlơi truh, git gai pơsir, pơkra hĭ tơlơi truh kiăo tui bruă hơmâo jao, ngă bruă tañ, tŭ yua, lăp djơ̆; lăi pơthâo glăi tañ, rơkâo hăng anom gơgrong bruă git gai pơsir hĭ hơdôm bruă yua gưl prong hloh dưi pơsir.