Ƀrô tal hơdor glăi 40 thun hrơi pơpŭ nai pơtô Việt Nam hăng 120 thun hrơi akŏ pơdong  sang hră gưl prong Y Hà Nội, pơ ala brơi khua mua Ping gah, Kơnuk kơna, Khua dêh čar ơi Phạm Minh Chính mơ-it nao djop rơnuk khua mua, ƀing apăn bruă, nai pơtô hăng čơđai hrăm dră ƀơi Sang hră gưl prong Y Hà Nội hơdôm tơlơi tơña bla hăng pơpŭ hiam klă hloh.

Khua dêh čar ta lăi pơtong, ră anai tơlơi rơkâo kơ bruă ia jrao, bơwih brơi tơlơi suaih pral mơnuih ƀon sang kiăng jai hrơi klă tui, sit biă ñu amăng thun blan klin Covid-19 glăk ngă tơnap tap hăng amra ƀuh hơdôm djuai klin phrâo dong. Mơng tơlơi sit nik anai, gơnong bruă ia jrao lăi hrŏm hăng Sang hră gưl prong Y Hà Nội hnun mơn kiăng gơgrong amăng bruă mă samơ̆ amra ba glăi lu tơlơi hiam klă. Kơtưn hơkrŭ kjăp hăng pơtrut gum pơgôp mut hrŏm; pơjing Ping gah amăng sang hră mă bruă tơpă sit, hơđong kjăp; klă dong amăng bruă git gai, mă bruă mơng khul grup Ping gah hăng ƀing apăn bruă Ping gah.