Mơguah lơ 8/12, ƀơi kual giăm guai tơring čar Tây Ninh hăng tơring čar Prey Veng (Kur), Khua dêh čar ơi Phạm Minh Chính hăng Khua dêh čar Kur ơi Hun Manet git gai hrŏm mông ngă lơphet pok dua bơnah amăng jang jar kmar Tân Nam-Meun Chey. Đĭ pơhiăp amăng mông ngă lơphet, Khua dêh čar ơi Phạm Minh Chính pơsit tong dua bơnah amăng jang jar kmar Tân Nam-Meun Chey pok rai “glông jơlan sĭ mơdrô” phrâo, pơgôp kơtưn tơlơi rô nao rai bơwih ƀong huă, sĭ mơdrô, tuai čuă ngui hăng pơbưp nao rai mơnuih ƀôn sang dua bơnah, laih dong hơkrŭ tơlơi rô nao rai giang mah, ngă hrŏm sui pơ anăp.

Khua dêh čar lăi pơtong Việt Nam hăng Kur lĕ dua boh dêh čar ha guai jê̆ giăm, yua hrŏm ia krông Mê Công, pơtrut tơlơi rô nao rai “ha guai hiam klă, gru grua giang mah, ngă hrŏm djop mơta, hơđong kjăp sui thun” hăng giăm 60 thun rơgao. Hơdôm boh amăng jang jar kmar ƀơi guai lŏn ia jing anih tô nao rai yôm amăng pơđĭ kyar bơwih ƀong huă amăng kual. Rơnoh sĭ mơdrô dua bơnah amăng hơdôm thun giăm anai tŏ tui giăm 10 klai đôlar Mi/thun hăng him lăng thun 2025 đĭ truh 12 klai đôlar Mi.