Tui hăng tơlơi lăi pơthâo, tơlơi pơgôp hiăp ƀơi mông jơnum, bruă kơsung blah ƀơi Trung Đông dŏ kơtang đôč, ƀu thâo hlâo hiư̆m pă ôh, bơbeč kơ apui yua ia jâo ƀơi rŏng lŏn tơnah, amăng anun hơmâo Việt Nam. Pơ anăp anai, Khua dêh čar lăi ƀu dưi ngă kơƀah ia săng, ia jâo ôh, ƀu dưi pơdơi ôh bruă pơkra gơnam, sĭ mơdrô, ƀu dưi ngă rung răng amăng dêh čar ôh. Khua dêh čar pơtă hlâo bruă pơkra gơnam, sĭ mơdrô ia săng ia jâo khŏm klă, ƀu dưi pioh lui ia săng ia jâo, sĭ pơmă, ngă rung răng anih mơdrô, hơdôm anom bruă bơdjơ̆ nao khŏm pơgăn bruă sĭ mơdrô ia săng ia jâo ča čot pơ guai, khut bơtơhmal mơtăm ƀing ngă soh.

Sui pơ anăp, Khua dêh čar kiăng Ding jum pơkra gơnam sĭ mơdrô ngă hrŏm hăng hơdôm ding jum, anom bruă kơsem min ĕp hơdră pơsir hĭ, đah mơ̆ng tañ dưi prăp rơmet mă pô apui yua ia jâo amăng lŏn ia, kah hăng hơmâo blơi mơ̆ng lu dêh čar hloh, prăp rơmet, pơhlom apui yua ia jâo mă pô. Kơsem min pơplih glăi dong hơdôm anih juăt mơdrô ia jâo; pơđom ia jâo dêh čar, hnun kah mơ̆ng dưi pơhlom hơmâo djŏp apui yua ia jâo sui pơ anăp./.