Amăng mông ră ruai bơkơtuai, Khua dêh čar ơi Phạm Minh Chính pơsit yôm hơdôm tơlơi gir run mơ̆ng pô Khua dêh čar ơi Anwar Ibrahim ăt kah hăng mơ̆ng Malaysia hăng sa bôh dêh čar ngă Khua Khul ASEAN amăng pơtrut pơsir tơlơi ƀu mơ-ak ƀơi guai dêh čar Thái Lan hăng Kur; biă ñu pơphun bruă pơbưp kơplah wah Khua dêh čar Kur hăng Khua djru bruă Khua dêh čar Thái Lan lơ 28/7 phrâo rơgao hăng hmâo laih tơlơi pơkôl pơdơi pơblah, jing yak nao klă blung a djru wai lăng tơlơi kơtang tui anô̆ rung răng kơplah wah dua bôh dêh čar.

Lăi nao bruă gum hrŏm dua bơnah, dua Khua dêh čar tŭ ư hrŏm amra lăi pơthâo nao rai, kơtưn pran đăo kơnang, gum hrŏm hmâo hơdôm bruă mă pioh ngă dơlăm hloh dong bruă gum hrŏm abih bang, amăng anun đing nao pơtrut gum hrŏm pơplih phrâo pơčeh phrâo, bôh thâo măi mok, apui yua, pơkĕ apui kơplah wah Việt Nam, Malaysia, Singapore pioh pơjing glông hrĕ apui lơtrik ASEAN; tañ kĭ pơkôl kơ bruă blơi sĭ braih pioh Việt Nam djru pơhlôm hơđong braih huă kơ Malaysia./.