VOV4.Jarai - Pơhiăp ƀơi mông jơnum bruă ngă hrŏm bơwih ƀong, anom ngă ƀong hrŏm thun 2022 hăng anăn “Pơplih hăng boh thâo mrô - Tơlơi pơtrut đĭ kyar bơwih ƀong ngă hrŏm, anom ngă ƀong hrŏm amăng rơnuk phrâo pơlir hăng ngă tui Tơlơi pơtrun mrô 20 NQ/TW” pơphun amăng mơguah lơ 23/9, Khua dêh čar ơi Phạm Minh Chính lăi rơđah, pơplih phrâo boh thâo mrô jing tơlơi khŏm hơmâo mơng bruă pơđĭ kyar bơwih ƀong, ngă ƀong hrŏm ƀu dưi ƀu ngă tui ôh, ƀu dưi dŏ lăng đôč ôh; yua hnun, ƀing ta khŏm pơplih tơlơi pơmin, thâo hluh tui; thâo lăng nao pơ anăp; khŏm pơtrut mă yua boh thâo ia rơgơi phrâo, măi mok pôr pơhing, thâo pơčeh phrâo, iâu pơthưr abih bang mơnuih ngă bruă, kiăng kiăo hmao, yak nao hrŏm hăng hơdôm bruă bơwih ƀong pơkŏn.

Anih jơnum pơčrông sai bruă

Mông jơnum pơphun bưp ƀơi anăp wơ̆t hăng lăng amăng tivi. Ƀơi mông jơnum, ƀing khua hơmâo bơkơtuai, pơtŏng glăi boh than hơmâo ngă amăng bruă mă yua mrô lăi hrŏm hăng pơplih mă yua boh thâo mrô amăng bruă bơwih ƀong hrŏm mơng khul grup lăi hơjăn; laih dong lăi nao tơpă hơdôm tơlơi dŏ tơdu, aka ƀu dưi ngă, tơlơi tơnap, tơlơi lông lăng hăng hơdôm bruă kiăng ngă mông anai đah mơng pơtrut pơplih phrâo mă yua mrô amăng hrơi blan pơ anăp, pơtrut pran jua kơ tơlơi bơwih ƀong hrŏm pơđĭ kyar tañ hăng hơđong kơjăp, nao hrŏm hăng bruă pơsit brơi rơđah hloh Tơlơi pơtrun mrô 20 mơng Ping gah dêh čar ta.

Siu H’Mai: Pơblang