Ƀrô hrơi pơhmư̆ hrơi ngă lơphet Rơwang hrơi tơjuh gưl prong tal 78 Jơnum min khua pơ ala Sang gum hơbit djŏp dêh čar hăng bruă mă dua bơnah ƀơi dêh čar Mi, mơguah lơ 18/9 (tui mông dêh čar anai), ƀơi plơi prong San Francisco, ala čar California, Khua dêh čar ơi Phạm Minh Chính pơhmư̆ “Jơnum bruă bơwih ƀong Việt nam - Mi ngă hrŏm gah boh thâo măi mok, pơčeh phrâo” yua Ding jum man pơphô akŏ bruă hăng tuh pơ alin hơmâo ngă hrŏm hăng Sang anih jưh pơ ala Việt Nam ƀơi San Francisco hăng Khul sĭ mơdrô dêh čar Mi - ASEAN či pơphun. Ƀơi mông jơnum, pơ ala kơ hơdôm anom bơwih ƀong mơ̆ng dua boh dêh čar hơmâo bơkơtuai tơpă sit kơ tơlơi gêh gal tuh pơ alin, amăng anun pơƀut kơ bruă măi mok, pơčeh phrâo; kiăng gum hrŏm bruă pơplih mă yua boh thâo mrô mơ̆ng Việt Nam.

Hăng tơlơi pơmin “Pô kơtang djru ba pô tơdu; čơđai djru ba ƀing tha; pô pơdrong djru ba pô rin” laih anun hăng tơlơi pơmin “lui hĭ abih tơlơi soh sat mơ̆ng đưm hlâo, lăng nao pơ anăp, pơsir hĭ tơlơi ƀu mơ-ak mơ̆ng rơnuk blah ngă”, Khua dêh čar čang rơmang mơnuih ƀôn sang, anom bơwih ƀong dêh čar Mi rai pơ Việt Nam ƀuh tơlơi pơplih mơ̆ng Việt Nam; pơsit Kơnuk kơna Việt Nam amra pok bah amăng čơkă abih bang anom bruă rai tuh pơ alin sĭ mơdrô djơ̆ tơlơi phiăn, hơđong, klă hiam yua kơ tơlơi pơdrong sah, kơjăp kơtang mơ̆ng rim boh dêh čar, trơi pơđao yâo mơ-ak kơ mơnuih ƀôn sang.