Khua dêh čar brơi thâo, bruă pơphun ngui ƀong tê̆t tui phiăn juăt Bính Ngọ 2026 laih rơgao hơmâo lu tơlơi klă ƀiă pơhmu hăng thun hlâo, mơnuih ƀôn sang čơkă thun phrâo mơ-ak mơ-ai, pơđao pran jua, hiam klă, bă blai pran khăp; bruă mă thun phrâo hơmâo pok pơhai mơng hrơi blan blung a tui hơdôm tơlơi črâo trun mơng gơnong glông hăng Kơnuk kơna.

Khua dêh čar rơkâo anom bruă kơnuk kơna ngă tui gru grua, pơplih phrâo djop mơta amăng pơphô bruă, pơtum pơƀut; ngă tui hơdră bruă tañ, djơ̆ hăng tŭ yua; ngă bruă hơbot, tơpă amăng bruă akŏ phun, gum hrŏm kjăp kơplah wah hơdôm anom bruă; thâo pơmĭn khin ngă, thâo glăm ba; djă pioh pran gum pơgôp, mut hrŏm, lăng yôm hrơi mông hăng ngă bruă khut khăt lăp djơ̆.