Kiăng pơtrut tơlơi rô nao rai giang mah gru grua hăng pơlir hơbit kjăp ƀiă dong, dua čô khua dêh čar Việt Nam hăng Timor Leste tŭ ư kơtưn pơbưp nao rai khua mua hăng djop gưl, ƀơi anăp lĕ tal rai čuă mơng Khua mir sir Timor Leste pơ dêh čar Việt Nam. Dua čô khua pơsit tong amra dong yua tơdruă hăng gum hrŏm tŭ yua amăng hơdôm tal jơnum bơkơtuai djop bơnah amăng kual hăng jar kmar.

Amăng mông bưp khua WEF Klaus Schwab, Khua dêh čar pơsit tong Việt Nam amra tŏ tui mut hrŏm, pơgôp yôm amăng hơdôm tơlơi pơčeh, bruă mă mơng WEF. Čang rơmang WEF amra gum hrŏm hăng Việt Nam pơphun lu mông jơnum pơƀut ƀing rơgơi kơhnâo, ƀing thâo gah hơdră bơwih ƀong huă amăng rŏng lŏn tơnah hăng amăng kual kiăng pơčrông sai hơdôm bruă đing nao hrŏm, kiăng hơmâo dong tơlơi pơtrut phrâo, amăng anun hơmâo bruă mă yua boh thâo ia rơgơi kiăng pơtrut hơkrŭ glăi hăng kơtưn amăng bơwih ƀong amăng rŏng lŏn tơnah.