Nao čơkă khua mua amăng grup hyu mă bruă mơ̆ng keh prăk IMF rai čuă Việt Nam, Khua dêh čar ơi Phạm Minh Chính đăo kơnang laih anun abih bang mă bruă tal anai hăng lu sang bruă, anom bruă gah Việt Nam, Grup amra thâo rơđah tơlơi pơhing bơwih ƀong huă mơnuih mơnam ƀơi Việt Nam thun 2023 hăng hơdôm blan dŏ glăi amăng thun 2024. Khua grup IV mơ̆ng IMF rơkâo Việt Nam kiăng ngă pơgiong tơlơi phiăn pơkă, ngă gêh găl kơ bruă sĭ mơdrô tơpă; kơtưn git gai wai lăng, pơhlôm pơgang tơlơi soh ƀong kông ngăn; pơsir hĭ anŏ gun pơhưč tuh pơ alin, boh nik ñu amăng bruă čuk pơkra jơlan nao rai, pơkra apui yua hơdjă…..

Bơni kơ hơdôm tơlơi gir run mơ̆ng IMF pioh kơ Việt Nam, biă mă ñu pơčrâo brơi hơdră yua prăk kăk, Khua dêh čar ơi Phạm Minh Chính rơkâo IMF ăt kah pơpha, ĕp lăng re se pơtong glăi, lăi lui hlâo jơlan hơdră bơwih ƀong huă amăng rŏng lŏn tơnah, anŏ bơbeč djơ̆ atur tơlơi bơwih ƀong huă amăng kual laih anun lăi pơthâo bruă yua prăk kăk lu, bruă prong kơ Việt Nam thâo; kơtưn bruă ngă hrŏm, djru boh thâo ia rơgơi hăng pơtô hrăm gah bruă git gai wai lăng bơwih ƀong huă, wai lăng prăk kăk, prăk pơblih nao rai hăng tač rơngiao, pok pơhư prong, pơtô hrăm mơnuih mă bruă kơ Việt Nam kiăng pơđĭ tui tơlơi thâo thăi amăng rơnuk mut phung hăng jar kmar.