Amăng mông bưp, Khua dêh čar ơi Phạm Minh Chính pơsit tong, Việt Nam lêng kơ lăng Japan lĕ dêh čar ngă gŏp đăo gơnang, yôm phăn hloh hăng sui thun. Dua bơnah brơi thâo, tơlơi rô nao rai ngă hrŏm yôm phăn kơplah wah Việt Nam-Japan glăk amăng thun blan pơđĭ kyar hiam klă, kơtang tui hăng sit nik amăng djop mơta bruă.

Khua dêh čar ơi Phạm Minh Chính rơkâo dua bơnah tŏ tui hơkrŭ kjăp pran đăo gơnang kơđi čar hluai tui hơdôm tal čuă nao rai gưl khua mua pơprong kah hăng djop gưl, gơnong bruă; kơtưn pơlir hơbit, ngă hrŏm kơplah wah hơdôm boh ƀon lan, anom bơwih ƀong; pơtrut pơbưp nao rai mơnuih ƀon sang, amăng anun Japan sem lăng amuñ ƀiă ngă hră visa, anăp nao lui hĭ visa brơi mơnuih ƀon sang Việt Nam nao pơ Japan kiăng pơtrut ngă hrŏm bơwih brơi tuai čuă ngui, pơbưp nao rai mơnuih ƀon sang; ngă gêh gal brơi giăm 500 rơbâo čô mơnuih ƀon sang Việt Nam ƀơi Japan dưi dŏ hơdip, hrăm hră hăng mă bruă.