VOV4.Jarai - Mơguah lơ 17/10/2022, Khua dêh čar ơi Phạm Minh Chính hơmâo tŭ jum Khua ding jum gơgrong bruă sĭ mơdrô hăng pơkra pơjing gơnam dêh čar Australia Tim Ayres ƀrô hrơi rai čuă Việt Nam git gai hrŏm Jơnum khua mua OECD - Đông Nam Á 2022 ƀơi Hà Nội. Khua dêh čar rơkâo Khua ding jum Tim Ayres đing nao pơtrut dong ngă hrŏm bơwih ƀong huă-sĭ mơdrô -tuh pơ alin kơplah wah dua boh dêh čar, amăng anun bruă Australia tŏ tui pok gơnam đang hmua, akan hơdang mơng Việt Nam dưi ba nao sĭ mơdrô; ngă gêh gal brơi anom bơwih ƀong sĭ mơdrô Việt Nam tuh pơ alin ƀơi Australia laih dong pơsur anom bơwih ƀong sĭ mơdrô Australia kơtưn tuh pơ alin pơ dêh čar Việt Nam.

Khua dêh čar tŭ jum khua ding jum gơgrong gah bruă sĭ mơdrô hăng pơkra pơjing gơnam Australia

Khua dêh čar ăt rơkâo Australia ngă gêh gal brơi mơnuih ƀon sang Việt Nam ƀơi Australia dŏ hơdip, mă bruă, mut hrŏm hăng mơnuih ƀon sang ƀơi anai. Khua ding jum Tim Ayres pơsit tong Kơnuk kơna Australia lêng kơ lăng yôm tơlơi rô nao rai ngă hrŏm hăng dêh čar Việt Nam hăng čang rơmang ngă kjăp tui tơlơi rô nao rai hăng Việt Nam; pơtrut dong bruă ngă hrŏm hăng Việt Nam amăng bơwih ƀong huă-sĭ mơdrô-tuh pơ alin, ngă hmua, pơtô pơjuăt, gru grua, bruă mă.

VOV/Siu Đoan: Pơblang