Khua dêh čar pơdah pran jua ol kơdol, pơpŭ bơni kơ Khua ding jum Jakkapong Sangmanee hrŏm hăng Khua mua mơng Thái Lan hơmâo rai mơyut kơ Khua git gai Ping gah dêh čar; lăi pơtong anai lĕ pơdah tơlơi ngă giang mah, pơlir hơbit hăng thâo khăp pap nao rai mơng Khua mua hăng mơnuih ƀôn sang dua bơnah.

Ƀrô tal anai, Khua dêh čar lăi glăi tơlơi jak iâu mơng Khua dêh čar Thái Lan Sretha Thavisin rai čuă Việt Nam hăng git gai hrŏm jơnum kơnuk kơna Việt Nam-Thái Lan tal 4 amăng hrơi blan gêh gal hloh. Dua bơnah ăt pơlăi nao rai hăng tŭ ư sa, dua jơlan gah ngă hrŏm dua bơnah pơ anăp dong, hơmâo pok pơhai tŭ yua jơlan hơdră “Tlâo pơlir hơbit”, kơtưn ngă hrŏm amăng pơgang rơnuk rơnua, sĭ mơdrô, tuai čuă ngui hăng pơdŭ pơgiăng gơnam, amăng anun đing nao pơlir kơtang ƀiă dong amăng jơlan rơdêh por, jơlan rơdêh ôtô, jơlan rơdêh treng.