Amăng mông bưp, Khua dêh čar ơi Phạm Minh Chính hơmâo mơ-it nao tơlơi pơpŭ bơni tơl Ping gah, Kơnuk kơna hăng mơnuih ƀôn sang Lao lăi hrŏm kah hăng Khua git gai Ping gah, Khua mir sir Lao hăng bơnai ñu hnun mơn kơ hơdôm tơlơi hning rơngŏt hrŏm, pran khăp brơi kơ Ping gah, Kơnuk kơna hăng mơnuih ƀôn sang Việt Nam lơm Khua git gai Ping gah dêh čar ơi Nguyễn Phú Trọng, sit biă ñu dêh čar Lao hơmâo pơphun mơyut jôk gưl dêh čar amăng 2 hrơi kiăng hơ-ŭ hơdor kơ Khua git gai Ping gah dêh čar ơi Nguyễn Phú Trọng, mơng anun pơdah tơlơi rô nao rai yôm phăn, giang mah, lêng ha pran mơng dua boh dêh čar.

Khua dêh čar lăi pơtong, lơm dŏ hơdip Khua git gai Ping gah dêh čar ơi Nguyễn Phú Trọng lêng kơ đing nao bruă djă pioh, ƀu pơdơi hơkrŭ kjăp hăng pơđĭ kyar tơlơi rô nao rai gru grua yôm phăn Việt Nam-Lao; bơni kơ bơnai Khua git gai Ping gah, Khua mir sir Lao hơmâo hră mơ-it ol kơdol pran jua kơ bơnai Khua git gai Ping gah dêh čar ơi Nguyễn Phú Trọng.