Ƀrô nao jơnum khua mua pơprong ASEAN-Khul ngă hrŏm kual Tong wĭng (GCC) hăng čuă jơmư dêh čar Saudi Arbia mơ̆ng lơ 18-20/10, tui tơlơi jak iâu mơ̆ng pơtao dêh čar Saudi Arabia, ơi Abdulaziz Al Saud. Mơmŏt lơ 18/10 tui mông ƀơi anun, Khua dêh čar ta ơi Phạm Minh Chính hơmâo tŭ jum Khua group Ajlan&Bros.

Ƀơi mông tŭ jum, ơi Ali Al-khatib, Kơ-iăng khua gitgai kông ty Ajlan&Bros brơi thâo, pơ anăp anai kông ty gơñu čang rơmang pok pơhư prong hloh ngă hrŏm tuh pơ alin ƀơi Việt Nam hăng rơkâo kơnuk kơna Việt Nam laih anun djop ding jum ngă gêh găl hloh brơi kông ty tuh pơ alin pok pơhư prong bruă mă ƀơi Việt Nam. Khua dêh čar ơi Phạm Minh Chính lăi, Việt Nam amra ngă hrŏ, djru kơ group Ajlan&Bros tuh pơ alin sĭ mơdrô, pok pơhư prong hăng djop sang bruă sĭ mơdrô ƀơi Việt Nam laih anun Khua dêh čar čang rơmang dưi čơkă khua mua Group sĭ mơdrô prong Ajlan&Bros ƀơi Việt Nam, pioh ngă tui hơdôm tơlơi kiăng tuh pơ alin sĭ mơdrô mơ̆ng kông ty anai ƀơi Việt Nam.