APM Holding lĕ group sĭ mơdrô hăng tuh pơ alin ƀơi rŏng lŏn tơnah, mă bruă amăng lu mơta bruă, hăng gru phun akŏ pơdong truh 120 thun rơgao, group anom bruă sĭ mơdrô anai hơmâo tuh pơ alin ƀuh ƀô̆ mơta ƀơi 130 boh dêh čar hăng 100.000 čô mơnuih mă bruă. Khua dêh čar lăng yom biă mă  tơlơi gêh găl, rơnoh prăk, boh thâo ia rơgơi hăng tơlơi thâo git gai wai lăng mơnuih mă bruă mơ̆ng anom bruă anai. Khua dêh čar bơni kơ rơnoh prăk tuh pơ alin, boh thâo ia rơgơi hăng tơlơi kơhnâo git gai wai lăng ăt kah hăng bruă tuh pơ alin mă bruă sĭ mơdrô mơ̆ng Group APM Holding rai pơ Việt Nam, djru hrŏm bruă mă sĭ mơdrô gah bruă pơdŭ pơgiăng gơnam amăng jơlan ia rơsĭ hăng tơlơi bơwih ƀong huă ƀơi Việt Nam.

Khua dêh čar brơi thâo, hơmâo rơbêh 3.200 km hang ia rơsĭ, dŏ amăng khul 20 boh dêh čar bơwih ƀong huă gêh găl prong. Việt Nam hlăk pơtrut kơtang bruă čuk pơkra jơlan nao rai, amăng anun bruă mă pơdŭ pơgiăng jơlan ia rơsĭ hăng khul grup ƀattô pơprong pơhrŏ ƀiă rơnoh prăk apah logistics hlăk pơmă, pơđĭ tui pran pơhno mă bruă bơwih ƀong huă pơdŭ pơgiăng gơnam tam hăng bơwih ƀong huă. Khua dêh čar rơkâo group anai kơsem min lăng, ngă hrŏm lu kơčăo bruă rơđah rơđong mơ̆ Việt Nam hơmâo tơlơi gêh găl hlăk iâu pơthưr tuh pơ alin nao kah hăng tơdrun kompan Liên Chiểu ƀôn prong Đà Nẵng, tơdrun kompan hăng jar kmar Cần Giờ, ƀôn prong Hồ Chí Minh, hơdôm boh tơdrun kompan pơ kual Kơdư, kual Tong krah, kual Yŭ dơnung.