VOV4.Jarai - Ƀơi Ƀirô Kơnuk kơna, Khua dêh čar ơi Phạm Minh Chính tŭ jum Khua mir sir Singapore yă Halimah Yacob glăk rai čuă gưl Kơnuk kơna pơ dêh čar Việt Nam. Khua mir sir yă Halimah Yacob pơsit tong Singapore lăng yôm bruă pơđĭ kyar ngă hrŏm hăng dêh čar Việt Nam. Kơ tơlơi rô nao rai dua bơnah, Khua dêh čar rơkâo dua boh dêh čar rơkâo dua bơnah gum hrŏm pok pơhai tŭ yua tui hră kĭ pơkôl amăng tal rai čuă, pơgôp pok pơhai tŭ yua amăng ngă hrŏm yôm phăn kơplah dua boh dêh čar kơ bruă mă yua apui lơtrik pơkra phrâo, pơhlôm hơđong amăng plang Internet, ayuh hyiăng, pơtô pơjuăt, pơđĭ kyar mơnuih mă bruă; laih dong rơkâo dua boh dêh čar anăp nao pơjing “Tơlơi rô nao rao ngă hrŏm bơwih ƀong mă yua boh thâo phrâo - bơwih ƀong hiam hơdjă Việt Nam - Singapore”.

Khua dêh čar ơi Phạm Minh Chính tŭ jum Khua mir sir Singapore

Kơ hơdôm bruă amăng kual hăng jar kmar, dua čô khua tŭ ư tŏ tui gum hrŏm kjăp kiăng tŏ tui gum pơgôp, gơgrong ngă akŏ amăng kual ASEAN; tŏ ngă tui tơlơi pơmĭn hrŏm amăng kual ASEAN amăng kual ia rơsĭ Ngŏ. Dua čô khua tŭ ư pơtrut dong hơdôm bruă ba glăi tơlơi dưi prong mơ̆ ngă hrŏm bơwih ƀong huă, sĭ mơdrô amăng kual ASEAN, mơng anun pơtrut ngă hrŏm amăng djop mơta bruă.

VOV/Siu Đoan: Pơblang