Ƀơi mông tŭ jum, Khua dêh čar ơi Phạm Minh Chính lăi, Việt Nam pơplih hơbô̆ bruă pơđĭ kyar, amăng anun khŏm pơđĭ kyar tañ hăng hơđong kjăp; kơnang kơ boh thâo ia rơgơi, tơlơi pơčeh phrâo, boh thâo mrô; pơđĭ kyar bơwih ƀong mơtah, bơwih ƀong pơdar nao rai, bơwih ƀong thâo pơčeh, biă ñu pơđĭ kyar bruă pơkra hrĕ apui añĕ.

Khua dêh čar kiăng Khul sĭ mơdrô hrĕ apui añĕ đơ đam rŏng lŏn tơnah hăng hơdôm grup ngă ding kơna ngă hrŏm hloh dong hăng anom mơdrô Việt Nam amăng bruă man pơdong anih anom sang măi, jao boh thâo djru ba, biă ñu lĕ ngă hrŏm pơtô pơjuăt mơnuih mă bruă rơgơi pơkra hrĕ apui añĕ, jao boh thâo ngă bruă, djru Việt Nam hơmâo ƀing kơhnăk, rơgơi mơbruă dưi ngă bruă djơ̆ hăng tơlơi hơduah ĕp ƀơi anih mơdrô. Kơnuk kơna Việt Nam pơsit, gir pơđĭ kyar kjăp kơtang bruă sĭ mơdrô hrĕ apui añĕ, anăp nao ba Việt Nam jing dêh čar yom amăng bruă pơkra hrĕ apui añĕ đơ đam rŏng lŏn tơnah.