VOV4.Jarai - Tlam lơ 3/10, Khua dêh čar ơi Phạm Minh Chính tŭ jum yă Era Dabla-Norris, Khua grup krăo lăng mơng Keh prăk jar kmar (IMF) amăng tơlơi bơwih ƀong huă pok prong hăng bruă prăk kak mơng hơdôm boh dêh čar ding kơna glăk rai čuă hăng mă bruă ƀơi Việt Nam. Khua dêh čar pơpŭ bơni hơdôm tơlơi gum djru prong prin mơ IMF djru brơi dêh čar Việt Nam mơng hơdôm thun blan blung a pơđĭ kyar truh ră anai, hơdôm thun giăm anai, bruă črâo ba hơdră bruă, djru boh thâo hăng pơtô hrăm brơi mơnuih mă bruă, sit biă ñu lĕ hơdôm hră lăi pơthâo, sem lăng hăng rơkâo đĭ amăng hơdôm bruă wai lăng bơwih ƀong huă amăng hrơi blan hơmâo klin Covid-19. Pơlăi nao rai tơlơi bơwih ƀong huă ƀơi Việt Nam, Khua dêh čar brơi thâo, hrŏm hăng bruă tŏ tui pơgang klin Covid-19, tơlơi bơwih ƀong huă ƀơi Việt Nam ră anai glăk tŏ tui hơđong hăng hơkrŭ glăi kơtang. Bruă git gai wai lăng mơng Kơnuk kơna Việt Nam glăk pơphun kjăp, hơdeč hmar, hmao tlôn, Khua dêh čar rơkâo IMF đing nao djru brơi Việt Nam lĕ sa boh dêh čar glăk pơđĭ kyar; kơtưn amăng bruă črâo ba amăng hơdră bruă brơi Kơnuk kơna hăng hơdôm anom bruă bơdjơ̆ nao amăng wai lăng bơwih ƀong huă, pơsir hĭ hơdôm tơlơi lông ră anai; tŏ tui djru brơi hơdôm jơlan hơdră pơtô hrăm; djru boh thâo măi mok amăng bruă wai lăng bơwih ƀong huă; gir run djru brơi Việt Nam pơđĭ kyar bơwih ƀong mơtah, hluai tui hơdôm anŏ pơplih mơng ayuh hyiăng hăng pơplih mă yua boh thâo phrâo…

VOV/Siu Đoan: Pơblang