Khua dêh čar ta lăi pơtong, Việt Nam pơpŭ biă mă tơlơi ngă giăng mah mơak klă hơmâo mơ̆ng đưm hlâo, dưi pơbŭ đĭ mơ̆ng rơnuk ngă hơhrŭ blah ayăt pơklaih rơngai lŏn ia, lơ̆m Việt Nam lĕ lŏn ia blung a tŭ yap kơnuk kơna phrâo akŏ pơdong jăng jai ƀơi dêh čar Algieria thun 1958.

Khua dêh čar ơi Phạm Minh Chính lăi pơtong lĕ, mah lu anih amăng rŏng lŏn tơnah ră anai hlăk pơblih, tơlơi lir hơbit jĕ giăm dua bơnah dêh čar ăt kŏn pơblih lơi, yua kơ Việt Nam hăng Algieria ngă hrŏm na nao kiăng găn rơgao tơlơi tơnap tap, lông lăng wơ̆t tơdah kơtang hloh hai. Hăng tơlơi ngă giăng mah bơnah ngă hrŏm tong ten hloh, phrâo akŏ pơjing đôč, Khua dêh čar ta ăt rơkâo dua bơnah tañ akŏ pơjing akŏ bruă či ngă hrŏm rơđah rơđong; pơtrut bruă rô nao rai brơi ƀing khua mua pơprong čuă jơmư trư găn; pok pơhư prong bơwih ƀong huă, sĭ mơdrô hăng tuh pơ alin. Khua mir sir dêh čar Algieria dong yua bruă khua mua pơ ala mơnuih ƀôn sang dêh čar anai tañ pơsit hĭ hră pơkôl hơmâo kĭ dua bơnah kiăng ngă gêh găl kơ bruă pok prong lu kơčăo bruă mă ia jâo, pơkra ming ia jâo pioh sĭ mơdrô mơ̆ng sang bruă mơdrô Việt Nam ƀơi dêh čar Algieria pô gơgrong.