Mông jơnum pơƀut bơkơtuai 5 mơta tơlơi, amăng anun hơmâo 3 tơlơi phiăn: Tơlơi phiăn pơplih, pơhrua tui hơdôm tơlơi mơ̆ng Tơlơi phiăn tơhan dŏ gak; Tơlơi phiăn pơgang, pơkơdong glăi bruă blơi sĭ ană mơnuih (pơkra glăi); Tơlơi phiăn Kơđŏm pơsit hră pơ-ar (pơkra glăi) hăng 2 tơlơi kiăng hơmâo čih pơkra tơlơi phiăn anun lĕ: Tơlơi phiăn mă jia prăk pơhrui mơ̆ng anom bơwih ƀong (pơkra glăi); Tơlơi phiăn phăt kơđi dân sự (pơkra glăi).

Lăi mông jơnum anai hăng 5 mơta tơlơi, lêng kơ tơlơi yôm phun, tơnap, bơdjơ̆ nao dlăm bruă bơwih ƀong - mơnuih mơnam, Khua dêh čar kiăng ding kơna amăng Kơnuk kơna pơƀut pran jua pơmin ngă bruă; pơgôp hiăp djơ̆ akŏ, djơ̆ phun tơhnal, lăi nao bruă yôm, bơ hơdôm tơlơi dŏ phara aka ƀu djơ̆ hrŏm lĕ kiăng bơkơtuai glăi dong, rơkâo tơlơi pơgôp hiăp mơ̆ng Kơnuk kơna, pơhlôm djơ̆ hrơi pơkă, tŭ yua mơ̆ng mông Jơnum. Biă ñu, Khua dêh čar kiăng hơdôm anom bruă pôr pơhing pioh lu mông pôr pơthâo bruă čih pơkra tơlơi phiăn, pôr pơthâo hơdjă ngă bruă, pơtô brơi mơnuih ƀôn sang, biă ñu hơduah tơña kơ bruă čih pơkra tơlơi phiăn kơ ƀing bơdjơ̆ nao, mơnuih apăn bruă, kơhnâo boh thâo ia rơgơi, boh thâo mơ̆ng jar kmar.