Ƀơi mông jơnum, ƀing ding kơna Khul lăng glăi bruă mă pơkơtưn ƀudah pơplông mă bruă, apah bơni laih anun pơblang rơđah anŏ dưi ngă hăng aka ƀu dưi ngă, phun ñu ba truh hăng tơlơi hrăm kiăng pơđĭ tui boh tŭ yua, tơhnal pơkă bruă či ngă amăng thun 2024 kiăng pơblih phrâo ba glăi boh tŭ yua lu hloh amăng bruă mă pơplông hăng apah bơni; Ngă giong hră tơlơi phiăn pơtrun mă bruă amăng Khul tui hơdră pơpha bruă mă rơđah hloh, pơđĭ tui boh tŭ yua tơlơi gơgrong ba mơ̆ng rim čô ngă ding kơna amăng khul.

Thun 2023, lu bruă mă pơkơtưn khăp kơ lŏn ia, pok pơhai ngă tui tŭ yua, hơmâo bang bơngač; Bruă mă pơpŭ bơni kơ ƀing ba gru hlâo laih anun hơmâo apah bơni hmao kru. Khua mir sir, Khua dêh čar hơmâo kĭ rơbêh 1.900 pok hră pơtrun apah bơni kơ 103.600 čô mơnuih, khul grup mă bruă ba glăi boh tŭ yua lu….Pơhiăp ƀơi mông jơnum, Khua dêh čar Phạm Minh Chính lăi pơtong, bruă apah bơni djơ̆ bruă, djơ̆ mơnuih, hmao kru hăng ăt khom đing nao kơ bruă sem lăng, pơtong glăi tong ten; pơtrut pơsur ngă tui lu mơta tơlơi pơplông, apah bơni hmao kru, anăm hơmâo tơlơi soh glăi; pơtrut ngă bruă pơtô lăi, pôr pơthâo kiăng tañ ƀuh, pơhrăm hăng pơlar prong tui djop bruă mă hiam klă ba gru hlâo.