Tơhnal pơkă mơ̆ng gơnong bruă tuai čuă ngui dêh čar ta truh thun 2025 čơkă ƀiă biă mă ñu 35 klăk wot čô tuai dêh čar tač rơngiao hăng 120 klăk wot čô tuai amăng lŏn ia; truh thun 2030 čơkă hmâo 50 klăk wot čô tuai dêh čar tač rơngiao, 160 klăk čô tuai amăng lŏn ia. Kiăng ngă giong tơhnal pơkă anun, tui hăng Khua dêh čar, Gơnong bruă tuai čuă ngui khom pơplih phrâo tơlơi pơmin, hơdră ngă hăng hơdôm jơlan gah pơčeh phrâo, pơplih phrâo, ha amăng plĕ, ba glăi bôh tơhnal; ngă tui “Pơlir hơbit kơjăp phik, gum hrŏm klă, gum hrŏm abih bang”.

Khua dêh čar rơkâo Jơnum lăi pơthâo nao rai, bơkơtuai kiăng ĕp ƀuh jơlan pơsir kơ hơdôm tơlơi ƀiă hrơi, sui thun; ĕp tơbiă hơdôm tơlơi lăi glăi kơ sa dua tơlơi phun pioh gơnong bruă tuai čuă lăng pơđĭ kyar tañ hăng kơjăp. Khua dêh čar rơkâo đing nao lăi rơđah bruă kiăng mă yua hơdôm hơdră bruă hơget pioh kơtưn pơlir hơbit pơđĭ kyar tuai čuă lăng, pơđĭ tui bôh tơhnal iâo pơhrui hăng mă yua ngăn rơnoh; Kiăng hmâo hơdră hơpă pioh pơsur, ngă gal brơi pơtrut pơđĭ kyar tuai čuă ngui; Jơlan gah hơpă pioh pơđĭ kyar pơlar mơnuih mă bruă tuai čuă ngui, biă ñu mơnuih mă bruă kơjăp./.