Hră lăi pơthâo amăng mông jơnum brơi ƀuh, amăng 11 blan thun anai, rơnoh prăk tuh pơ alin kơ bruă čar hơmâo ba yua amăng dêh čar ta truh 461 rơbâo klai, dưi ngă rơbêh 65% rơnoh pơkă, lu hloh 6,77% pơkă hăng tal anai thun hlâo hăng mrô lu hloh pơkă hăng thun hlâo rơbêh 122,6 rơbâo klai prăk. Mah mrô prăk tuh pơ alin kơ bruă čar amăng dêh čar klă hloh kơ thun 2022, samơ̆ ră anai ăt dŏ 41 boh ding jum, anom bruă pơ gơnong dlông hăng 24 boh tơring čar hơmâo mrô ba yua prăk dŏ ƀiă đơi pơkă hăng lu anih pơkŏn amăng dêh čar.

Ƀơi mông jơnum, khua mua kơnuk kơna, ding jum, anom bruă, tơring čar hơmâo lăi pơthâo bruă mă yua prăk tuh pơ alin kơ bruă čar rơnang yua mơ̆ng tơnap duh glăi lŏn hmua kông ngăn mơnuih ƀôn sang djơ̆ anih čuk pơkra pơklaih ala lŏn; hơdră ngă hră pơar lu črăn, hơdôm tơlơi pơkă amăng tơlơi phiăn dŏ pơrơkua nao rai lơ̆m ming pơkra glăi....Klah čun ƀơi mông jơnum, Khua dêh čar Phạm Minh Chính pơtă pơtăn kơ djop ding jum, anom bruă, tơring čar ba yua rơnoh prăk ƀiă đơi, brơi khut khăt pơsir tơlơi dŏ tơdu, mơ̆ng anun pok pơhai ngă tui tŭ yua hloh hơdôm rơnoh prăk tuh pơ alin man pơdong ƀơi djop sang bruă, anom bruă, plơi pla tơring čar pô ta kiăng ba glăi boh tŭ yua hloh.