Amăng mông jơnum, ƀing khua mua pơčrông sai lu tơlơi, hơnong pơkă, jơlan gah pơđĭ kyar hăng hơdră amăng dưm dăp man pơdong kual tal anai. Đĭ pơhiăp pơđut mông jơnum, Khua dêh car Phạm Minh Chính lăi pơtong, kơ tơlơi pơmĭn, bruă git gai wai lăng, kiăng hruă kjăp, kiăo tui tơlơi sit nik hăng ngă tui khut khăt tơlơi pơtrun mơng Jơnum Ping gah tal XIII hăng tơlơi pơtrun mơng Ding jum kơđi čar; kơ akŏ bruă 5 thun, hơdră 10 thun pơđĭ kyar bơwih ƀong huă-mơnuih mơnam; kiăo tui tơlơi pơtrun mơng Jơnum Ping gah djop gưl.

Khua dêh čar lăi rơđah, kiăng ngă dơlăm tui tơlơi gơgrong, tơlơi yôm mơng kual hăng dêh čar hơmâo bruă yôm phun lĕ kơđi čar, bơwih ƀong huă, pơhlôm rơnuk rơnua, mơng anun ĕp tơlơi dưi phara, tơlơi gal hloh, hrưn đĭ kơtang amăng bơkơtưn. Khua dêh čar lăi pơtong tơlơi gơgrong, tơlơi dưi mơng kual Ngŏ dơnung, hơmâo djop tơhnal gal kiăng pơđĭ kyar ƀơi anih phun, hơbô̆ bruă ba gru amăng pơđĭ kyar bơwih ƀong huă-mơnuih mơnam amăng lŏn ia.