Amăng mông jơnum ƀing ding kơna kơnuk kơna pơčrông sai, sem lăng, pơgôp hiăp amăng 9 boh tơhnal hơmâo 7 tơlơi rơkâo čih pơkra tơlơi phiăn, tơlơi pơtrun hăng 02 črăn tơlơi phiăn. Pơđut mông jơnum, Khua dêh čar Phạm Minh Chính lăi pơtong, 9 boh tơhnal ba tơbiă amăng jơnum tal anai lĕ tơlơi prap lui yôm phăn brơi jơlan hơdră čih pơkra tơlơi phiăn, tơlơi pơtrun thun 2024 hăng pơ anăp dong. Khua dêh čar tŭ yap, lăng yôm djop ding jum: Kông ang, ling tơhan, phiah phiăn, man pơdong, Ding jum wai lăng rơhuông adai lŏn mơnai, sang bruă bruă kơnuk kơna Việt Nam hơmâo gir run prap lui, mơ-it tơlơi rơkâo bruă čih pơkra tơlơi phiăn, tơlơi pơtrun, hơdôm črăn tơlơi phiăn; gơgrong tŭ mă, lăi pơthâo brơi tong ten, djơ̆ tơhnal.

Khua dêh čar lăng yôm tơlơi pơgôp hiăp abih pran jua, gơgrong, djơ̆ tơlơi sit nik hăng pran jua pơgôp hiăp mơng ding kơna Kơnuk kơna hăng rơkâo ƀing khua ding jum git gai tŭ mă djop tơlơi pơgôp hiăp mơng Kơnuk kơna, pơgiong hơdôm tơlơi rơkâo čih pơkra tơlơi phiăn djơ̆ tơlơi pơkă.