Amăng mông mơ-ak mơ-ai bă blai tơlơi khăp ƀu-eng, pơhiăp ƀơi mông bưp, Khua dêh čar Phạm Minh Chính brơi thâo, lơ 22/12/2023, giăm 2 klai čô mơnuih ƀơi rŏng lŏn tơnah čơkă tơlơi hok mơ-ak lơ̆m Khul khua Sang gum hơbit djŏp dêh čar pơsit tŭ yap Tê̆t ngă yang thun phrâo jing hrơi pơdơi rim thun mơ̆ng Sang gum hơbit djŏp dêh čar. Anai jing tơlơi hok mơ-ak kơ giăm 2 klai čô mơnuih ƀơi rŏng lŏn tơnah. Ƀrô hrơi anai, pơ ala kơ Ping gah, Kơnuk kơna hăng mơnuih ƀôn sang Việt Nam, Khua dêh čar bơni kơ ƀing Khua anih jưh, Khua pơ ala mơ̆ng hơdôm anom bruă jar kmar kơ tơlơi khăp ƀu-eng, tơlơi ngă hrŏm tŭ yua, djru ba Việt Nam amăng thun 2023 hăng amăng hơdôm thun rơgao.

Khua dêh čar čang rơmang hăng đăo kơnang ƀing Khua anih jưh, ƀing khua gơgrong bruă, Khua pơ ala hơdôm anom bruă jar kmar ƀơi Việt Nam pơtrut tui boh tŭ yua pơtruh nao rai mơ̆ng ƀing gơñu, ba tơlơi ngă hrŏm kơplah wah hơdôm boh dêh čar, hơdôm anom bruă jar kmar hăng Việt Nam jai hrơi kjăp hloh, dlăm hloh, tŭ yua hloh; yua kơ rŏng lŏn tơnah rơngai, rơnuk rơnua, ngă hrŏm hăng pơđĭ kyar kjăp.