Tŭ ư tơlơi jak iâu mơ̆ng kơnuk kơna hơdôm dêh čar pơlir hơbit Arab UAE hăng kơnuk kơna dêh čar Thổ Nhĩ Kỳ, tlam lơ 28/11, Khua dêh čar Phạm Minh Chính hăng bơnai ñu hrŏm hăng grup khua mua mơ̆ng kơnuk kơna Việt Nam nao jơnum hrŏm khua mua pơprong pơčrong sai bruă ayuh hyiăng lŏn tơnah, amăng mông jơnum tal 28 hơdôm bơnah kĭ hrŏm hră pơkôl sang gum hơbit djop dêh čar kơ anŏ pơblih ayuh hyiăng lŏn tơnah COP28, pơphun hơdôm bruă mă dua bơnah ƀơi dêh čar UAE laih anun čuă jơmư sit nik dêh čar Thổ Nhĩ Kỳ mơ̆ng lơ 29/11 truh baih lơ 3/12/2023.

Jơnum khua mua pơprong kơ bruă pơgăn anŏ pơblih sat ayuh hyiăng lŏn tơnah pơphun amăng mông jơnum prong COP28 jing sa tơlơi jơnum lu dêh čar yôm biă mă amăng thun pơčrong sai anŏ pơblih ayuh hyiăng lŏn tơnah. Jơnum khua mua pơprong tal anai him lăng hơmâo rơbêh 70.000 čô khua pơ ala mơ̆ng 197 boh dêh čar, kual EU hăng hơdôm rơbâo anom bruă gah rơngiao kơnuk kơna, sang bruă sĭ mơdrô, khul hlăk ai hăng hơdôm khul grup pơkŏn.Biă mă ñu hơmâo 100 čô khua mua apăn akŏ kơnuk kơna dêh čar hăng kual lŏn amăng rŏng lŏn tơnah nao jơnum. Khua dêh čar Phạm Minh Chính nao jơnum hrŏm tal anai djơ̆ mông Việt Nam kiăng lăi pơthâo tong ten tơlơi glăm ba, bruă mă mơ̆ng ta pô, djru pơsir tơlơi lông lăng hrŏm amăng rŏng lŏn tơnah djru hrŏm pơgăn anŏ pơblih sat ayuh hyiăng; djru kơ jar kmar thâo hluh tong ten jơlan hơdră, tơlơi gir run khut khăt hăng tơlơi tơnap tap lông lăng mơ̆ Việt Nam ngă amăng bruă bong glăi hăng anŏ pơblih ayuh hyiăng lŏn tơnah.