Thun 2023, Ding jum Jơlan glông pơdŭ pơgiăng hơmâo jŭ yap glăi abih bang, ngă giong, pơđĭ tui jơlan hơdră tơlơi phiăn pơtrun ngă bruă hăng hơmâo ba glăi lu boh tơhnal tŭ yua yôm. Phun ñu pơtrut bruă pơpha djop gưl, tơlơi dưi git gai amăng bruă mă kơnuk kơna yua kơ Ding jum jơlan glông pơdŭ pơgiăng wai lăng. Boh nik ñu bruă čuk pơkra jơlan, hơmâo pơphun čuk pơkra 26 kơčăo bruă, amăng anun čuk pơkra tañ hloh 6 kơčăo bruă yôm mơ̆ng dêh čar hăng tal blung a pơphun tơgŭ mă bruă čuk pơkra jơlan, ngă lơphet mơ̆ng ataih, lăng nao rai pơƀuh ƀô̆ mơta amăng tivi.

Hơmâo ngă giong, ba yua 20 kơčăo bruă, amăng anun kơnong jơlan rơdêh đuăi hmar hơmâo 9 kơčăo bruă glông ataih 475 km, pơ alin abih bang jơlan rơdêh đuăi hmar hơmâo ba yua truh kơ 1.900 km. Ƀơi mông jơnum, ƀing khua mua pơala djop ding jum, anom bruă, tơring čar, anom bruă sĭ mơdrô, khul grup mut hrŏm hơmâo pơčrong sai pơblang tong ten tơlơi tơnap tap, boh tơhnal dưi ngă, anŏ kơƀah tơdu, gun gan, kah pơpha tơdruă tơlơi thâo thăi tom găn rơgao, bruă mă klă, thâo pơčeh phrâo, tŭ yua amăng bruă mă, rơkâo djru kơ anom bruă wai lăng jơlan glông pơdŭ pơgiăng ăt ngă giong tơhnal pơkă, djơ̆ bruă pơtrun amăng thun 2024.