Amăng hơdôm thun rơgao, Khul pơtrut bruă pơtom hiăp mơnuih ƀôn sang Japan hmâo laih lu bruă mă, ba glăi bôh tơhnal, djru pơtrut tơlơi rô nao rai giăng mah hăng gum hrŏm lu mơta kơplah wah Việt Nam hăng Japan kah hăng: Pơkiăo nao grŭp pel ĕp lăng bruă bơwih ƀong, pơtô pơhrăm, bôh thâo rai pơ̆ Việt Nam; pơphun hơdôm bruă pơtrut tuh pơplai – sĭ mơdrô kơplah wah dua bôh dêh čar; djru pơđĭ kyar bôh thâo mơnuih mă bruă kơ Việt Nam; pơbưp hăng bơkơtuai hăng hơdôm grŭp mơ̆ng Việt Nam čuă Japan djru klă hơdôm bruă mă mơ̆ng Khua anih jưh pơ ala kơ Việt Nam ƀơi Japan.

Pơ̆ anăp anai, Khua dêh čar ta Phạm Minh Chính lăi lĕ, dua bơnah khom pơtô juăt dong rơnuk hlăk ai dua bôh dêh car ƀu pơdơi djă pioh hăng ngă tui pran jua giăng mah lĕ kông ngăn yôm phăn kơplah wah dua djuai ania; ngă tui hơdôm bruă hmâo ngă laih, mă tŭ tơlơi găn rơgao mơ̆ng hơdôm bruă akă dưi ngă; pơplih phrâo bruă Gum hrŏm abih bang jing hơdôm jơlan hơdră; rơwang bruă rơđah, ngă brơi tơlơi rô nao rai dua bôh dêh čar jai hrơi jai mut dơlăm, sit nik, ba glăi bôh tơhnal hloh./.