Đĭ pơhiăp amăng mông bưp, pơ ala brơi khua mua Ping gah, Kơnuk kơna, Khua dêh čar Phạm Minh Chính pơpŭ bơni, lăng yôm hăng pơdah tơlơi hok mơ-ak hăng hơdôm boh than dưi ngă, tơlơi gum pơgôp mơng ƀing čih boh pia, adôh suang gah ling tơhan; djop rơnuk mơnuih apăn bruă, nai pơtô, mơnuih kiăo tui hrăm, ling tơhan mơng sang hră.

Khua dêh čar čang rơmang sang hră amăng thun 2024 hơmâo tơlơi dưi prong ƀiă dong pơhmu hăng thun 2023, rơwang mă bruă tơdơi klă ƀiă hlâo anun. Ƀrô bơyan prap čơkă thun phrâo Giáp Thìn, pơ ala brơi khua mua Ping gah, Kơnuk kơna, Khua dêh čar pơpŭ ƀing apăn bruă, nai pơtô, ling tơhan amăng sang hră gưl prong gru grua adôh suang ling tơhan hiam drơi jăn pran jua, amăng thun phrâo hơmâo lu tơlơi dưi phrâo.