Jơnum lăi pơthâo akŏ bruă dưm dăp man pơdong hăng pơsur tuh pơ alin ƀôn prong Cần Thơ lĕ bruă yôm phun amăng pok pơhai ngă tui bruă dưm dăp man pơdong ƀôn prong, pơhưč tuh pơ alin, pơtrut pơđĭ kyar bơwih ƀong huă-mơnuih mơnam ƀơi Cần Thơ pơ anăp anai.

Đĭ pơhiăp amăng mông jơnum, Khua dêh čar Phạm Minh Chính lăng yôm hăng pơpŭ bơni ƀôn prong Cần Thơ hơmâo ječ ameč čih pơkra, ngă pơgiong, mơ-it nao khua dêh čar pơtrun hăng lăi pơthâo bruă dưm dăp man pơdong ƀôn prong rơwang thun 2021-2030, anăp nao truh thun 2050 amăng jơnum anai. Hăng bruă dưm dăp man pơdong ƀôn prong Cần Thơ, Khua dêh čar pơsit tong, Cần Thơ lĕ sa amăng hơdôm boh tơring čar hơmâo tơlơi đing nao, tuh pơ alin lu hloh mơng Ping gah, Kơnuk kơna; hơmâo hơdră djru djop mơta, ha amăng plĕ, ngă gêh gal; hơmâo hơdră dưm dăp klă hloh.