Đĭ pơhiăp amăng mông jơnum, Khua dêh čar Phạm Minh Chính tŭ yap, lăng yôm hăng pơpŭ hơdôm tơlơi gir run abih pran jua hăng boh than dưi ngă mơng gơnong bruă sang bruă prăk thun 2023, pơgôp yôm phăn amăng boh than dưi ngă hrŏm đơ đam dêh čar. Kơ bruă jao tong ten Khua dêh čar rơkâo sang bruă prăk Kơnuk kơna đing nao git gai wai lăng bruă mă yua prăk kak brơi hơdeč hmar, lăp djơ̆, tŭ yua, gum hrŏm kjăp, na nao amăng hơdôm hơdră prăk kak pok prong lăp djơ̆, tong ten hăng hơdôm hơdră pok prong pơkŏn.

Hơnong pơkă ba tơbiă lĕ kiăng đing nao pơtrut pơđĭ kyar bơwih ƀong pơlir hăng bruă ngă hơđong bơwih ƀong pok prong, wai lăng hŭi prăk trun nua, pơhlôm bơkơnar prong amăng bơwih ƀong huă, hơđong bruă yua prăk kak lŏn ia, tač rơngiao hăng pơhlôm brơi bruă mă amăng hơdôm anom bruă brơi čan prăk.