Tơdơi kơ hmư̆ tơlơi pơgôp hiăp pơčrong sai amăng mông jơnum, Khua dêh čar Phạm Minh Chính brơi thâo, hrơi mông gêh găl hăng boh tơhnal dưi ngă amăng thun 2023 mơ̆ng dêh čar laih anun pơčrâo rơđah bruă dưi ngă laih mơ̆ng anom bruă Gru grua pơrơguăt drơi jăn hăng tuai čuă ngui, amăng anun lăi nao anom bruă Gru grua Pơrơguăt drơi jăn hăng Tuai čuă ngui hrŏm hăng djop gưl, djop anom bruă, djop tơring čar ăt pơblih pơtrut tui tơlơi pơmin bruă mă gah “gru grua hiam” jing bruă kơnuk kơna wai lăng gah gru grua hiam’ gir run pơsir tơlơi tơnap tap, gun gan, ĕp anŏ klă ngă tui, hneč mă anŏ gêh găl, pok pơhai khut khăt, sa amăng plĕ, pơsir hăng gir run kiăng tŭ mă boh tơhnal tŭ yua anun.

Kơ bruă či ngă pơ anăp adih, thun 2024 hăng thun tơdơi anai Khua dêh čar rơkâo anom bruă gru grua pơrơguăt drơi jăn hăng tuai čuă ngui ăt khom pok pơhai tŭ yua djop jơlan hơdră, hră pơtrun, tơlơi phiăn mơ̆ng kơnuk kơna hăng ping gah pơkă kơ gru grua, boh nik ñu Tơlơi Klah čun mơ̆ng Khua git gai ping gah Nguyễn Phú Trọng ƀơi mông jơnum gru grua hiam đơ đam dêh čar.