Nao pơhmư hơmâo Khua dêh čar, Khua grup hơdôm hơdôm boh dêh čar Kur, Myanmar, Thái Lan, Khač hăng Việt Nam. Khua dêh čar Phạm Minh Chính hơmâo tơlơi pơhiăp yôm ƀơi mông Jơnum. Jơnum pơƀut pơtŏng glăi bruă ngă hrŏm Mê Công - Lan Thương amăng 3 thun rơgao, laih anun tơlơi pơgôp yôm mơ̆ng MLC hăng tơlơi rơngai, rơnuk rơnua, ngă hrŏm hăng pơđĭ kyar kual Mê Công hăng amăng kual, laih dong  pơsit ngă hrŏm kjăp hloh, akŏ pơdong kual gum ngă bruă yua kơ tơlơi rơngai pơ anăp, pơdrong sah kơplah wah hơdôm boh dêh čar Mê Công - Lan Thương.

Kơ jơlan ngă hrŏm amăng hrơi blan pơ anăp, ƀing khua lăi nao hơdră pơđĭ kyar, mă ană mơnuih ngă phun, nao hrŏm mơ-ak kơplah wah ană mơnuih hăng ayuh hyiăng glai klô. Jơnum pơtrut ngă hrŏm Guai pơđĭ kyar bơwih ƀong Mê Công - Lan Thương ; kơsem min hơdră jơnum, ngă hrŏm, pok pơhai pơtrut tui bruă Pơčeh phrâo Mê Công - Lan Thương. Pơhiăp ƀơi mông jơnum, Khua dêh čar Phạm Minh Chính lăi, Kơnuk kơna Việt Nam lêng kơ lăng yôm hăng amra gum hrŏm hăng dêh čar Khač wơ̆t hăng hơdôm boh dêh čar Mê Công pơtrut ngă hrŏm Mê Công - Lan Thương jai hrơi đĭ kyar kjăp kơtang, tŭ yua.