Amăng dua hrơi jơnum mă bruă, mông mơnit sir kep ƀu pơdơi ôh hơmâo 30 bruă mă, tal hyu mă bruă mơ̆ng Khua dêh čar Phạm Minh Chính nao jơnum hrŏm WÈ Davos lok 54 ba glăi boh tŭ yua hiam klă lu mơta, dưi ngă djop bruă pơtrun, tơlơi kiăng pơdah lui hlâo, pioh glăi gru hiam laih anun bang hyu kơtang rup rap mơ̆ng Việt Nam hơmâo anŏ gêh găl prong, kơnuih hing ang phrâo. Djop mơta tơlơi đĭ pơhiăp mơ̆ng Khua dêh čar hơmâo pơtruh brơi lu mơta tơlơi kiăng lăi nao rơđah kơ lŏn ia Việt Nam pơđĭ kyar beč bal hmar amăng bruă mă, pơblih phrâo, jing anih lăp tuh pơ alin pơhưč lu kơ djop group mă bruă pơprong ƀơi rŏng lŏn tơnah.

Tal nao čuă jơmư sit nik dêh čar Hungary hăng Romania tơdơi kơ jơnum WEF Davos giong, Khua dêh čar Phạm Minh Chính ăt hơmâo ba glăi boh tŭ yua hiam klă mơ̆n. Amăng tal nao čuă, Khua dêh čar hơmâo 30 wơ̆t bưp nao rai hăng khua mua pơprong amăng kơnuk kơna, lŏn ia, anom bruă pơ ala mơnuih ƀôn sang dêh čar, ping gah kơđi čar dua boh dêh čar; pơhiăp amăng mông jơnum bưp khua mua, nai pơtô sang hră gưl prong, jơnum hrŏm ƀing ngă bruă sĭ mơdrô, bưp khul khua mua ngă giăng mah hăng Việt Nam mơ̆ng dua boh dêh čar nao čuă, bưp mơnuih ƀôn sang Việt Nam laih anun čuă hơdôm boh anih bơwih ƀong huă pơkra ming gơnam ia rơgơi phrâo dêh čar nao čuă tal anai.