Mông jơnum anai kiăng ngă rơđah hloh hơdôm jơlan hơdră ngă bruă, tơlơi pơtrun mơ̆ng Ping gah, Kơnuk kơna kơ pơđĭ kyar kual lŏn dăo ia krông Hồng, kual bơwih ƀong yôm phun gah Kơdư, Kual plơi prong jưh jom hăng tơring čar Hải Dương, biă ñu lĕ Tơlơi pơtrun mơ̆ng Ding jum kơđi čar kơ hơdră pơđĭ kyar bơwih ƀong huă mơnuih mơnam, pơhlôm rơnuk rơnua kual lŏn dăo ia krông Hồng truh pơ thun 2030, lăng nao pơ anăp thun 2045.

Pơhiăp ƀơi mông Jơnum, Khua dêh čar Phạm Minh Chính lăi, Hải Dương pơƀut lu tơlơi gêh gal yôm phara, dưi pơhno či pơđĭ kyar bơwih ƀong huă - mơnuih mơnam tañ hăng kjăp, jing anih ngă pơhưč anom bruă tuh pơ alin amăng dêh čar wơ̆t hăng čar rơngiao, djru pơtrut đĭ kyar kơ Hải Dương hăng bang hyu amăng kual lŏn dăo ia krông Hồng wơ̆t hăng đơ đam dêh čar. hrŏm hăng anun, Khua dêh čar kiăng, pơtrut pơplih tơlơi bơwih ƀong, pơlir hăng pơplih hơbô̆ bruă đĭ kyar, pơđĭ tui mrô gơnam pơkra rai hăng dưi pơhno hrŏm gŏp, kiăo tui tơlơi pơplih mrô, boh thâo măi mok phrâo hăng pơčeh phrâo tơlơi rơgơi, pơđĭ kyar bơwih ƀong mơtah, bơwih ƀong pơdar nao rai.