Ră anai, Việt Nam hơmâo giăm 910 rơbâo anom bơwih ƀong glăk mă bruă lu hloh 3 wơ̆t pơhmu hăng thun 2011, hơmâo năng ai 14,4 rơbâo anom ngă ƀong hrŏm hăng rơbêh 5 klăk sang anŏ bơwih ƀong, kual bơwih ƀong prong gum pơgôp rơbêh kơ 60% GDP, năng ai 30% mrô mơnuih glăk mă bruă. Hơdôm anom bơwih ƀong, mơnuih bơwih ƀong hơmâo pơƀuh ƀô̆ ƀơi abih bang bruă sĭ mơdrô, mă bruă ƀu kơnong amăng dêh čar đôč ôh mơ̆ lu anom bơwih ƀong, mơnuih bơwih ƀong hơmâo ngă bruă hmư̆ hing, pơsit anŏ yôm gơnam tam hơmâo ba sĭ amăng kual hăng ƀơi rŏng lŏn tơnah.

Pơhiăp ƀơi mông ngă lơphet, pơ ala kơ khua mua mơ̆ng Kơnuk kơna, Khua dêh čar bơni, lăng yôm hơdôm tơlơi gum pơgôp prong mơ̆ng ƀing bơwih ƀong, mơnuih bơwih ƀong thun hlăk ai Việt Nam amăng bruă akŏ pơdong hăng pơđĭ kyar lŏn ia. Laih dong ăt bơni hăng tŭ yap Khul mơnuih bơwih ƀong thun hlăk ai Việt Nam hơmâo gum pơgôp, git gai, djru ba bruă Mơnuih bơwih ƀong thun hlăk ai amăng 30 thun rơgao. Khua dêh čar lăi, Kơnuk kơna lêng kơ thâo hluh, pơhmư̆ laih anun amra hơmâo lu hơdră djru kiăng ƀing bơwih ƀong dưi găn rơgao tơnap tap, hrưn đĭ ataih hloh ăt kah hăng gum hrŏm, dong yua kiăng Khul mơnuih bơwih ƀong thun hlăk ai Việt Nam pơđĭ kyar kơjăp kơtang hloh.