Tal nao čuă mơng Khua dêh čar Phạm Minh Chính pơ dêh čar Romania tal anai lĕ bruă pơbưp nao rai blung a gưl Khua dêh čar kơplah wah dua bơnah tơdơi kơ 5 thun rơgao. Amăng tal nao čuă, Khua dêh čar Phạm Minh Chính hơmâo mông bơkơtuai hăng Khua dêh čar, Khua mir sir, Khua pơ ala mơnuih ƀôn sang gơnong glông, gơnong yŭ dêh čar Romania. Hrŏm hăng anun, Khua dêh čar amra nao čuă hơdôm boh ƀon lan, sang hră gưl prong; nao jơnum bơkơtuai hăng anom bơwih ƀong sĭ mơdrô Việt Nam-Romania; bưp ƀing pơ ala grup giang mah Romania-Việt Nam hăng bưp ƀing apăn bruă, Khua anih jưh hăng mơnuih ƀôn sang Việt Nam hơdip ƀơi dêh čar Romania. Tal nao čuă anai kiăng ngă dơlăm tui tơlơi rô nao rai gru grua giang mah hăng ngă hrŏm djop mơta kơplah wah Việt Nam-Romania, pơtrut ngă hrŏm dua bơnah amăng hơdôm bruă hơmâo tơlơi gal prong hloh mơng dêh čar Romania hăng lăp djơ̆ tơlơi kiăng pơđĭ kyar lŏn ia Việt Nam.

Mơguah lơ 21/1 (yap tui mông ƀơi Romani) Khua dêh čar ta Phạm Minh Chính hmâo nao čuă Anom kơsem min hăng pơđĭ kyar tin học dêh čar Romani (ICI). Pơdah tơlơi ư-ang hăng čơkă mơ-ak Khua dêh čar ta Phạm Minh Chính – Khua Anom ICI brơi thâo, ICI hmâo bruă mă yôm phăn amăng pơtô pơhrăm mơnuih mă bruă măi mok pôr pơhing; djru pơtrut tơlơi pơđĭ kyar mơ̆ng Romani. Hơdôm rơwang bruă kơsem min hăng mă yua măi mok mơ̆ng ICI ƀu kơnong kơ ba glăi hơdôm jơlan nao phrâo ôh mơ̆, ñu dô̆ djru pơplih phrâo đut hlah hơdôm ngăn rơnoh hăng pơplih phrâo tơlơi hơdip mơda.

Pơhiăp ƀơi anai, Khua dêh čar ta Phạm Minh Chính brơi thâo, Việt Nam hmâo pơdŏng hăng pok pơhai laih bruă pơplih mrô Lŏn ia; Bruă kơsem min, pơđĭ kyar hăng mă yua bôh thâo pơčeh pơkra; pơdŏng Anom pơplih phrâo pơčeh phrâo Lŏn ia...; rơkâo Anom ICI Romani lăng Việt Nam lĕ bơnah gum hrŏm ba jơlan hlâo lơm pok prong gum hrŏm jar kơmar, djru Việt Nam pơtô pơhrăm mơnuih mă bruă kơjăp amăng bruă anai. Hlâo kơ anun, Khua dêh čar ta Phạm Minh Chính hmâo nao čuă Anom bruă sĭ mơdrô hăng bruă măi mok tơring čar Prahova hăng bưp khua apăn bruă, mơnuih mă bruă amăng Ƀirô anih jưh, khul mơnuih Việt Nam ƀơi Romani./.