Khua dêh čar brơi thâo, Việt Nam lêng kơ lăng yôm tơlơi rô nao rai jê̆ giăm hăng Romania; bơni biă kơ Romania dong yua hăng djru kơ Việt Nam amăng bruă blah ayăt pơklaih rơngai, pơlir hơbit lŏn ia hlâo adih ăt kah hăng akŏ pơdong hăng pơđĭ kyar lŏn ia rơnuk anai. Khua dêh čar Phạm Minh Chính hăng Khua ding jum Stefan-Radu Oprea hok mơ-ak ƀuh tơlơi rô nao rai dua bơnah Việt Nam - Romania glăk đĭ kyar klă hiam amăng lu bruă kơđi čar, pơtom hiăp, bơwih ƀong, ling tơhan, gru grua, pơtô hăng pơjuăt.

Hrơi blan pơ anăp anai, hrŏm hăng bơkơtuai khua mua prong hăng djŏp gưl, ƀơi abih bang glông jơnum pơbưp, Khua dêh čar Phạm Minh Chính kiăng dua bơnah pơsit tơlơi ngă hrŏm bơwih ƀong - tuh pơ alin - sĭ mơdrô jing gong tơmeh phun amăng tơlơi rô nao rai dua bơnah, djơ̆ hăng tơlơi yôm, hmư̆ hing bruă kơđi čar, pơtom hiăp. Dua bơnah kiăng pơtruh bruă pơdŭ pơgiăng, amăng anun hơmâo rơdêh por; mă yua klă hră kĭ pơkôl EVFTA.